Arrangement

Badnajazz lørdag

Program for Badnajazz 2023

Laurdag 1. april 

Kl. 11.00, torget
Parade torget – Voss kulturhus (gratis)
Alle er velkomne til vera med!

Kl. 11.3o, Voss kulturhus, biblioteket
Aina Basso, årets festivalforfattar på Falturiltu (gratis)
Falturiltu er verdas største nynorske barnebokfestival, og den går føre seg på Stord i veke 45 kvart år. Det er blitt ein fin tradisjon at du får møta årets festivalforfattar på Badnajazz under Vossa Jazz! 

Aina Basso er utdanna historikar og debuterte litterært i 2008 med ungdomsromanen Ingen må vite. Seinare har ho skrive ei rekke spanande historiske romanar, og sakprosa, for både ungdom og vaksne. For Inn i elden vart ho nominert til Brageprisen i 2012, og Kulturdepartementets litteraturpris og Nordisk råds pris for beste barne- og ungdomsbok i 2013. Ho vart tildelt Sokneprest Alfred Andersson-Ryssts pris for romanen Fange 59. Taterpige (2010), og for Finne ly (2014) fekk ho Bokbloggerprisen i kategorien Årets roman. I 2022 fekk ho tildelt Samlagsprisen for den skjønnlitterære forfattarskapen sin, og var festspeldiktar på Festspela i Ørsta og Volda.

Ho har turnert landet rundt med spanande formidlingar.

Kl. 12.00, Voss kulturhus, kultursalen
"Kashakas & Klikkerter"
Per, Daiyen og Audun er tre nysgjerrige supermusikarar som lett let seg av fascinera av nye lydar og instrument – som 'klikkerter' og 'kashakas'!

Den siste tida har dei vitja hundrevis av skuleelevar i Bergensområdet, og no tek dei med seg haugevis av dei merksnodige instrumenta til Vossa Jazz for at born og unge på festivalen skal få prøva seg.

Finst det nokon klikkert- og kashakasekspertar på Vangen, mon tru? Det trur me!

Per Jørgensen – vokal, trompet, perkusjon
Daiyen Jone Castro – vokal, fløyte, perkusjon
Audun Humberset – perkusjon

Kr 150

Kl. 16.00, Park Hotel Vossevangen, Vossasalen
Sigrid Moldestad: Regndråpeborna og andre dyr
Sigrid Moldestad til Vossa Jazz med plateslepp og familiekonsert!

I “Regndråpeborna og andre dyr” får små og store bli kjend med både regndråpeborna, grashoppa med grashoppefela, snigelen som sykla og kråka med alle dei skumle kråketankane...

Bak den regnvåte tittelen finn me eit nytt møte mellom Sigrid Moldestad sin musikk og diktaren Jan-Magnus Bruheim (1915-1988) sine tekstar. Sist gong var med den kritikarroste plata “Brevet til kjærleiken” frå 2014. Denne gong er det barnedikta til Bruheim som har fått nytt liv.

“Eg har tenkt på barnedikta sidan den gong. Han hadde ei eiga evne til å sjå verda frå barn sitt nivå. Me blir med ned i graset og opp i skyene. Det er fantasi og detaljar, men også ettertanke i mykje av det han skreiv. Tema som utanforskap og miljøkamp går att i fleire av dikta hans. At dei fortjente eit eige prosjekt er sikkert, og eg er veldig stolt av å presentere både konserten og eit splitter nytt familiealbum til Vossa Jazz” seier Moldestad.

Musikken hadde urpremiere på Førdefestivalen sommaren 2022 og var eit samarbeid bestilt av Førdefestivalen, Falturiltu og Vossa Jazz. No har Sigrid Moldestad og musikarane leikt seg i studio med produsentane Yngve L. Sætre og Iver Sandøy og spelt inn alle dei nye songane – albumet kjem ut 24. mars, på Grappa Musikkforlag.

 Medverkande:
Sigrid Moldestad – vokal, feler, ukulele
Jørgen Sandvik – strengeinstrument og vokal
Sondre Meisfjord – bass og vokal
Kåre Opheim – trommer og vokal

 Kr 150

Sjå https://vossajazz.no/program/ for heile programmet.

Kjøp billettar hjå TicketCo, https://vossajazz.ticketco.events/no/nb/e/vossa_jazz_2023 

Du kan kjøpa festivalpass til Badnajazz!
Born under 2 år gratis.